Претседателот на МАЧР Дарко Петровски е еден од основачите на Асоцијацијата пред 11 години и докажан професионалец во областа на менаџментот со човечките ресурси. Тој е дипломиран машински инженер и магистер на организациски науки и мастер за деловна ција од Економскиот факултет во Љубљана, Словенија.
„HR професионалците се способни да ја преземат улогата на лидери за промените во нашето општество“
Интервју со м-р Дарко Петровски,
Претседател на Македонската асоцијација за човечки ресурси
Претседателот на МАЧР Дарко Петровски е еден од основачите на Асоцијацијата пред 11 години и докажан професионалец во областа на менаџментот со човечките ресурси. Тој е дипломиран машински инженер и магистер на организациски науки и мастер за деловна ција од Економскиот факултет во Љубљана, Словенија. Во моментот е дел од докторските студии на Институтот за индустриско инженерство и менаџмент на Машинскиот факултет во Скопје.
Во текот на својот работен век има два поголеми блока, работејќи од 1998 година најпрво како прв раководител на Канцеларијата за стопански прашања при Австриската амбасада во Скопје и претставник на Австриската стопанска комора во Македонија, а потоа, од 2006 година како Раководител на одделот за човечки ресурси и организација во ЕВН Македонија. Во последните четири години, тој својата мисија ја реализира преку основањето на Талент бизнис инкубаторот Степ-ап, помагајќи им на македонските компании да ги зајакнат своите капацитети од аспект на организациската структура, човечките ресурси, деловните процеси, менаџмент системите и лидерскиот развој и да обезбедат конкурентска предност во и надвор од рамките на земјата. Тој е содружник и партнер во уште две консултантски и услужни компании и консултант на интернационалната компанија за регрутација на извршни менаџери со директен пристап Alexander Hughes Executive Search Consultants.
Дарко е активен чинител во македонското општество преку учество во работата и преземање на различни функции не само во Македонската асоцијација за човечки ресурси, туку и во Организацијата на работодавачи на Македонија, Националниот економско-социјален совет и Локалниот економско-социјален совет на град Скопје, во повеќе тела за развој на конкурентноста, образованието и пазарот на труд и учествува во различни проекти од национален интерес.
1. На изборното собрание во декември 2018 година бевте избран, а на почетокот на 2019 година ја преземавте должноста Претседател на Македонската асоцијација за човечки ресурси со мандат во следните три години. Можете ли да ни кажете нешто повеќе за Вашите заложби, идеи и визија како претседател на Асоцијацијата?
МАЧР е една од најпрогресивните и стабилно структурирани професионални здруженија во земјата, која успеа во претходниот период својата моќ да ја изгради преку раст и развој на своето членство, залагајќи се во развојот на професионалците кои работат во овој многу важен сегмент за секоја организација, независно од тоа дали таа е од јавниот или приватниот сектор, дали е голема или помала. Многу одамна развиените економии ја сфатија важноста на оваа професија која во својот фокус го има човечкиот капитал на една земја.
МАЧР има преку стотина индивидуални членови, а од оваа година и 11 корпоративни членови и е управувана од 11-член Управен одбор избран од Собранието. Располага со функционална трочлена извршна канцеларија која се грижи за оперативно функционирање на асоцијацијата и реализација на програмските активности.
Во 2020 планираме интензивирање на нашите напори за воведување на меѓународно признати стандарди и акредитација на професионалците, како чекор кон натамошно подигнување на квалитетот на професионалците, како анкер за реализација на нашата мисија. Овие процеси ќе бидат водечки и доминантни во следните неколку години и ќе не преокупираат заради активно држење на чекорот со најактуелните глобални предизвици, рамо до рамо со развиените земји. Оваа наша заложба ќе ја реализираме со проактивно членување во Европската асоцијација за менаџмент со луѓе (EAPM) и преку учеството на нашите членови во работата на техничкиот комитет ТК-260 на Меѓународната организација за стандардизација (ISO) и ТК 42 на државниот Институт за стандардизација.
Членовите на МАЧР во најголем број доаѓаат од приватниот сектор. Нашите заложби се насочени кон вклучување на професионалците од институциите во јавниот сектор. Ние сме подготвени активно и компетентно да придонесуваме во дизајнирање и спроведување на реформите неопходни за интеграцијата на нашата земја кон Европската Унија, со ставање на располагање на нашата експертиза за организациски и развој на човечките ресурси. Во овие напори ќе ја обезбедиме и поддршката, знаењето и искуствата од останатите национални асоцијации за човечки ресурси вмрежени во ЕАРМ.
Долгорочно ја гледам Македонската асоцијација за човечки ресурси како водечко професионални здруженија во земјата заради својата важност, мултидисциплинарност и значајност во развојот на економијата и општеството преку најголемото богатство - луѓето и како регионален лидер и иницијатор на позитивни промени со високо-компетентни членови, ефикасна канцеларија и богато портфолио на услуги и продукти.
2. 2019 година претставуваше јубилејна година за МАЧР, означувајќи го десетгодишното успешно постоење и функционирање на асоцијацијата. Во која насока ќе продолжи да се развива МАЧР и што може да очекуваме од МАЧР во 2020 година?
Програмата на МАЧР во својата содржина го има еден од најреномираните и етаблирани деловни годишни настани, Меѓународната конференција за човечки ресурси, која во 2020 како и минатата година ќе се одржи на Меѓународниот ден за човечки ресурси 20 мај. На овој датум традиционално ќе се прогласи најдобриот македонски HR менаџер, а од оваа година воведуваме и уште неколку категории во кои признанија ќе добијат истакнати амбасадори на професијата. Планираме и содржинско освежување, но и локациско поместување на нашите извонредно посетени месечни HR-Кафе настани надвор од главниот град, на кои редовно се среќаваат и вмрежуваат нашите членови со многумина заинтересирани слушатели за личен и професионален развој.
Во однос на комуникацијата, покрај редовните канали, како што е токму овој наш двоброј на електронскиот весник на МАЧР, кој од година во година ја збогатува својата содржина со стручни и научни написи и информации од областа на нашето делување, нашите страници на социјалните медиуми Facebook и LinkedIn и директната комуникација со нашите членови, планираме содржински дополнувања за зајакнување на нашата позиција во делот на застапување и лобирање за побрз економски и општествен развој, со теми од интерес за нашите индивидуални и корпоративни членови.
Посебно формирани комисии и тела пак од своја страна ќе работат на анализи на актуелни состојби на пазарот на труд, во областа на работното законодавство, движењата на платите и потребите за стекнување компетенции за потребите на организациите. Би ги издвоил и обуките „од нас за нас“ на актуелни теми од областа на менаџментот со човечките ресурси, на кои преку размена на искуства и дискусии работиме на натамошен професионален развој на нашите членови и на нивен напредок. Тука е и нашиот годишен HR-викенд, на кој тренинг центрите низ активности за тимско градење ги поврзуваме со нашите членови во еден релаксиран и мотивирачки амбиент.
Сакам во оваа прилика да најавам и една иницијатива за вклучување на младите во активностите на асоцијацијата преку создавање на мрежа на млади HR ентузијасти. Нашата работа продолжува во насока на структурирање на ефективни процеси на работа на асоцијацијата и воспоставување на принципи за транспарентно и ефикасно корпоративно управување.
3. Како искусен HR експерт, дали ќе може да ни кажете кои се најголемите предизвици со кои се соочуваат HR професионалците во нашата земја?
Исто како и во претходните години, нашите HR професионалци и натаму го пробиваат патот кон врвните структури во организациите, нешто што е одамна прифатено во развиените земји. Сѐуште се гради свеста кај главните менаџери и сопствениците на компаниите за важноста на HR функцијата и за нејзината стратегиска улога во реализацијата на целите на организациите, особено во градењето на капацитетите кои се клучни обезбедување конкурентска предност во земјата, а особено на регионалните и глобалните пазари.
Еден од главните предизвици кој е веќе присутен, но во следните години значително ќе ескалира, е недостатокот на компетентни работници на пазарот на труд. Причините за овие состојби лежат во долгогодишната структурна невработеност во државата, инертниот процес на бавно прилагодување на формалното образование кон потребите на пазарот на труд, недостатокот на соодветни капацитети за брзо стекнување на стручни знаења и квалификации, недостатокот на систем за грижа и развој за младите таленти, но и сѐ поприсутниот одлив на квалификувана работна сила надвор од нашата земја. Овие состојби ќе резултираат според моето мислење пораст на цените на пазарот на труд, а со тоа и на производите и услугите во целост. Потенцијал за амортизирање на овие состојби гледам во разумно и осмислено спроведување на неизбежните процеси за рационализација во јавниот сектор и политики за вклучување на сите расположливи капацитети во земјата од специфични маргинализирани групи.
За справување со овие предизвици, потребни се како системски, од страна на надлежните институции, така и поединечни мерки од страна организациите во насока на обезбедување на достоинствени услови за работа и системи за зголемување на продуктивноста, за развој и задржување на вработените, кои го следат прогресот на технологијата, дигитализацијата и конкуренцијата од другите земји. Важна улога ќе игра суштинското унапредување на социјалниот дијалог во земјата и подобрувањето на општите услови за живот, работа и водење бизнис во нашето општество базирани на правна сигурност, даночна предвидливост и извесност, ефективност и квалитет во вршењето на јавните услуги за граѓаните и бизнисот и грижа за младите генерации.
4. И за крај, што ќе им посакате на членовите и читателите на Човечки капитал во Новата 2020 година?
Моите лични желби се секогаш поврзани со мојот непоправлив оптимизам и патриотизам. Јас сакам да ги видам сите наши членови, читателите на нашиот весник, но и сите оние до кои ќе допрат моите зборови, како во 2020 со целосна одговорност си ја вршат својата работа и функција, без да подлегнат на постоечките аномалии и девијантност и да претставуваат пример за сите останати. Ние како HR професионалци сме способни да ја преземеме улогата на лидери за промените во нашето општество кои ќе доведат до пресврт на негативните тенденции кон позитивни и градење на едно високоетичко општество.
Градењето на свест за заеднички живот и интерес на сите различни групи и слоеви во општеството и екологија во секоја смисла на зборот се неопходност за нашиот опстанок како вид, народ, земја, што може да не доведе до остварувањето на нашите лични стремежи за добро здравје, радост и личен напредок и живот во благосостојба на сите наши сакани и блиски. Самиот број на годината 2020 има убава симетрија и симболика и јас лично влегувам со големи надежи во неа и тоа им го посакувам на сите наши членови, читатели и сограѓани.